Sugaton sa NDFP-Mindanao ang Bag-ong Tuig inubanan sa nagsagol nga pagbati – sa kasubo, kalipay ug paglaum. Tinuod, masub-anon kita sa dili mahulagway nga pag-antus ug kadaut sa kinabuhi ug kabtangan dulot sa bagyong Sendong. Hinuon, daku usab kaayo ang rason nga magmaya ug malaumon alang sa umaabot, tungod kay ang mga rebolusyonaryong kadaugan sa milabay’ng katuigan madasigong naghagit kanato pagpaasdang sa atong rebolusyonaryong gubat ngadto sa yugto sa estratehikong panagpatas sa mosunod nga pipila ka tuig.

Sa makausa pa, ipadangat namo ang pagduyog sa kasub-anan sa tanang nawad-an sa ilang mga minahal sa kinabuhi ug kabtangan niining pinakaulahing kalamidad. Ang Partido Komunista sa Pilipinas (PKP), ang NDFP-Mindanao, ug ang Bagong Hukbong Bayan (BHB) nagmobilisa na ug padayon pang magmobilisa sa tibuok rebolusyonaryong pwersa sa Mindanao sa paningkamot paghatag og hinabang ug rehabilitasyon.

Sa pagsubli, among ipalanog ang panawagan sa Partido Komunista paghangyo sa tanang rebolusyonaryong pwersa pagsaulog sa Bag-ong Tuig nga yano ug magdaginot, ug pagtunol sa ilang matigom ngadto sa mga biktima sa bag-ohay pa lang nahitabo nga trahedya. Among gipasalamatan ang tanang katawhan nga positibong nagtubag sa among panawagan alang sa pinansyal ug materyal nga mga kontribusyon, lakip na ang pipila ka dagkung kumpanya sa logging, mining ug agri-business companies.

Bisan pa sa pinakagrabeng tuig sa 2010 ug sa kadulom pa gihapon sa moabotay nga tuig 2012 ubos sa rehimeng US-Aquino, malipayon kaming mopahibalo sa katawhan sa Mindanao ug sa tibuok nasud nga niadtong tuig 2011, nakaangkon kita og malanog nga mga kadaugan sa Mindanao nga angayang saulogon. Ang Bagong Hukbong Bayan mitubo sa ihap sa ginsakpan ug armadong kusog nga mikabat og 15%; sa ginsakpan sa Partido Komunista nga mitubo ngadto sa 30%; sa usbaw sa ihap sa mga organisadong masa nga mikabat og 20%; ug sa pagdaghan sa nalunsad natong mga taktikal nga opensiba gikan sa total nga 250 niadtong 2010 ngadto sa 350 sa tibuok tuig sa 2011. Dugang pa, ang atong reporma sa yuta sa kabukiran nagkasubsub ug nagkalapad ang nalangkuban. Tinuod, ang kaugmaon sa atong pakigbisog alang sa nasudnong pagpalingkawas ug demokrasya masanag.

Alang sa tanang pamilya ug kahigalaan sa mga biktima sa bagyong Sendong, paningkamutan namo kutob sa mahimo paghatag og hustisya alang sa tanang biktima; pag-imbistigar sa gamot-hinungdan niini, ug pagsubay kinsa ang angay manubag niining binuhatan-sa-tawo nga katalagman. Kinahanglang ilunsad nato ang mga kampanya ug aksyong militar batok niadtong nagaguba-sa-kinaiyahan nga mga multinational companies ug batok sa reaksyunaryong gobyerno nga nagtugot kanila pag-opereyt ug paghatag kanila og proteksyon. Ngadto sa katawhan sa Mindanao ug sa tibuok nasud, angayang doblehon nato ang atong kaakuhan ug paningkamot pagkab-ot og mga rebolusyonaryong kadaugan nga modala sa rebolusyonaryong kalihukan paabante ngadto sa mas taas nga yugto sa gubat sa katawhan sa mosunod nga pipila ka tuig, paghatag kanato og dugang katakus pagpakgang ug pagsilot sa mga makasasala nga nagpahamtang sa maong mga katalagman, pagtabang pagpahiuli sa atong kinaiyahan, ug pagpugong sa umaabot pang mga katalagman.

Mabuhi ang Nasudnon Demokratikong Rebolusyon sa tuig 2012, ug sa mosunod pang katuigan!