“Padayon nga paslawon kg lutoson sg NPA-Negros kg sg pumuluyong Negrosanon ang pasista kg kontra-kauswagan nga Oplan Bayanihan sg rehimen US-Aquino,” ini ang pahayag ni Ka Juanito Magbanua, spokesman sg Aponinario “Boy” Gatmaitan Command (AGC) sg NPA Negros Island.

Suno kay Ka Magbanua nagapabilin nga prayoridad sg AFP kg PNP ang isla sg Negros sa idalom sg Oplan Bayanihan nga sa esensya ekstensyon lamang sg madinugu-on kg mapintas nga Oplan Bantay Laya (OBL) sg nagligad nga rehimen Arroyo. Wala pa matagaan sg hustisya ang mga biktima sg OBL kaangay sg extra-judicial killings, enforce disappearances, tortures, force evacuations kg iban pa nga porma sg human rights violations.

“Sa idalom sg Oplan Bayanihan ginpasingki pa sg AFP-PNP ang militarisasyon gamit ang pondo nga dapat tani para sa serbisyo sosyal kg pagka-on sg mga ginagutom sa Negros. Padayon gihapon ang ila pagtukod sg mga detatsment kg baraks mismo sa mga matawo nga lugar kaangay sg mga barangay centers, pagpaniktik kg pagpamahog sa masa, kg psy-war operations sg pagbinutig kg pagpakalain sa NPA.” dugang pa ni Ka Magbanua.

“Nagapabilin nga malig-on kg naga-isa ang kabilogan nga pwersa sg NPA sa isla sg Negros sa pagpamuno sg Partido Komunista sg Pilipinas kg komitido ang mga Pulang hangaway nga pasingki-on ang armado nga paghimakas para maabot ang estratehiko nga pagkapatas sa masunod nga lima ka tuig sa bulig kg suporta sg malapad nga masa,” siling pa ni Ka Magbanua.

“Sa karon mas naga-alburoto nga bulkan sosyal ang isla sg Negros bangud sg malala nga pagpamigos sg mga sakon nga agalon may duta kg burgesya komprador sa pagpamuno sg lokal nga warlord-burukrata kapitalista nga Gob Maranon. Gintugutan sg gobernador ang pagsulod sg mga makahalalit nga dalagku nga minahan, eco-turismo kg iban pa nga dumuluong nga negosyo. Madamo sg masang mangunguma nga nadulaan sg duta, biktima sg inhustiya-sosyal ang nagapangita na sg NPA,” paathag ni Ka Magbanua.

“Armado nga paghimakas ang sabat para mapunggan ining teroristang- agresyon sg rehimen US-Aquino kg sg lokal nga warlord-asyendero-burukrata nga Maranon kg sg mersenaryong tropa sg AFP-PNP. Pasingki-on pa sg NPA ang mga taktikal nga opensiba batuk sa mga pasistang tropa-militar kg mga private armies. "

“Ginapanawagan sg NPA nga maggwa o indi magtuman sg mando ang mga may konsyensya nga mga katapo sg miitar kg pulis sa serbisyo nga atakehon ang pumuluyo. Sa pagsingki sg mga opensiba sg NPA kg para malikawan ang halit sa sibilyan, dapat maglikaw ang mga sibilyan nga salakyan nga magpasakay sg mga katapo sg AFP kg PNP. Ginapangabay man sg NPA ang mga sibilyan nga indi magsakay sa mga salakyan nga pribado o pampasahero nga may presenysa sg AFP. Sa mga pumuluyo nga malapit sa detatsment, magpetisyon kamo nga magsaylo ang detatsment kg kon indi maghalin inyo tinguhaan nga balhinon ang inyo balay . Dapat untaton na sg AFP-PNP ang paggamit sg sibilyan bilang taming " pahayag ni Ka Magbanua.