Ginsering yana han Eften Martires Command han New People’s Army-Eastern Visayas nga ginpalandaw han gerilya nga opensiba ha Lapinig, Northern Samar hadin Enero 20 an dugang nga pagkusog han NPA sugad man an pagpanhimuwa han arogante nga pamostura han Armed Forces of the Philippines. “An reyd nga ginlansar han Rodante Urtal Command kontra ha mga pwersa han kaaway ha Lapinig usa nga kadaugan para ha NPA ngan nagringgal ha 8th Infantry Division han AFP nga waray mag-antum hin sugad nga atake,” sering ni Ka Karlios Manuel, tagapagyakan han EMC. “Naghihimo hin maitom nga propaganda an 8th ID agud tahuban an kaarawdan hini kahuman la ipahambog nga mapuypoy na an NPA ha rehiyon. Dugang pa, malisyoso nga gin-aakusaran han 8th ID an NPA hin panalapas han tawhanon nga katungod agud mailikay an atensyon tikang ha ekstrahudisyal nga mga panmatay ngan iba pa nga panalapas han militar nga bag-o pa la nabuksas ha Northern Samar.”

Ginsering ni Manuel nga gintarget han NPA an kapulisan ngan an pribado nga armado nga grupo ni Mayor Romualdo Menzon ha Lapinig dida han gab-i han Enero 20. “Gintumuyo han mga Pula nga mangaraway nga dis-armahan an kapulisan ngan an pribado nga armado nga grupo ni Mayor Menzon nga mga lehitimo nga target. Kundi, nandadlagan an mga pulis ngan waray umato, samtang hi Aurelio Jullata, usa nga pribado nga badigard han meyor, in nakigbalyuay hin bubto ha NPA ngan napatay. Nadis-armahan han NPA hi Police Offficer 3 Rowena Opena, ngan waray maano diri sugad han makalilisang nga pahayag han 8th ID.”

Nag-aro hin dispensa an tagapagyakan han EMC ha kasamari ni Romeo Senobio Jr., nga ginsusumat nga usa nga sibilyan, ngan ginsering nga iimbestigaran han NPA ini nga karukayaknon. “Diri target, waray pagdakpa ngan waray pagpusila han NPA hi Senobio, ha butnga han damo nga malisyoso nga alegasyon han 8th ID. Komo responsibilidad, gin-iimbestigaran han NPA kun kay ano nga naigo hi Senobia ha butnga han balyuay han buto giutan han mga Pula nga mangaraway ngan han badigard ni Menzon nga hi Jullata. Ginpapalusaran hin aksyon pandisiplina an mga myembro han NPA kun napamatud-an nga ginbutang ha risgo an mga sibilyan, diri sugad han militar nga nagpapatakas ha panalapas han tawhanon nga katungod.

“Ha kapariho nga isyu, diri target han NPA an mga sibilyan gamit an ​*command-detonated* nga paburuthon, waray hira gamita komo hosteyds, waray hira panulisa ngan waray hira pagkawati ha butnga han reyd. An paggamit han mga paburuthon in nakatarget ha kaaway sugad han naabot nga ira reimporsment. Pagsurundon han NPA nga paundangon ngan ipahirayo an mga sibilyan ha risgo ha butnga han taktikal nga opensiba, sugad man an pagtsek ha mga balay ngan pagseguro han palibot han operasyon. Ini nga mga malisyoso nga akusasyon han 8th ID waray iba kundi nangangarigkig nga birada nga resulta han dako nga kaarawdan.”

Ginbira pa ni Manuel an militar ini nga hinimo-himo nga panalapas han tawhanon nga katungod ngan mga ordinaryo nga krimen nga iginmementar ha NPA. “Makikita ha mga notisya nga naghuhugas hin kamot an militar kabahin han nagpapadayon nga panalapas han tawhanon nga katungod ha Northern Samar. Kadako han buot han militar nga ilikay an atensyon han publiko ha sugad nga mga panalapas pinaagi han pag-itsa hin mga buwa nga akusasyon han NPA. Usa nga human rights mission nga ginhimo hadin Enero an nagdokumento hin maabot ha 37 nga panalapas han katungod nga hinimuan han 8th ID samtang ginpapatuman an Oplan Bayanihan ha mga bungto han Northern Samar ha Catubig ngan Las Navas. Usa nga sibilyan nga amo hi Jovito Pajanustan an biktima han tortyur ngan ekstrahudisyal nga panmtay nga hinimuan han mga gintutuohan nga elemento han militar. Naaamong bisan an kabataan kun diin pira kagatos ha ira an nagkakamayda hin grabe nga kahadlok tungod han mga operasyon militar, sugad han pangagaw ngan paggamit han mga sundalo ha mga day care center *komo mga *barracks.

“Gintutugutan ini nga mga panalapas han katungod ilarum han Oplan Bayanihan han rehimen Aquino. Pero ha pagyinakan ngan pag-akto nga alagid-agid kan Gen Jovito Palparan nga nauna ha iya, ginbabasul han hepe han 8th ID nga hi Gen. Mario Chan an NPA han panalapas han mga katungod, samtang gin-iimplementar han iya mga tropa an terorismo nga estilo ni Palparan: mga ekstrahudisyal nga panmatay, panarhug ha sibilyan, pangukoy ha mga komunidad han sibilyan, pagtawag nga “komunista” ha mga progresibo nga organisasyon agud hatagan rason an pagpataya ha ira, ngan iba pa nga mga panalapas han tawhanon nga katungod ilarum han nagpapadayon nga klima han pagpatakas. Hin-o yana an tinuod nga kriminal ha gerra? Tungod kay waray pagbabag-o ilarum han rehimen Aquino, naato an katawhan ngan dugang nga nakusog an NPA tikang ha ira suporta. Sigurado nga masarang ngan makusog an mga taktikal nga opensiba han NPA, tungod han nagpapadayon nga ungara han katawhan para han hustisya sugad man an karuyagon nga tangpuson na an matalumpiguson ngan patiyupion nga sistema han paghahadi.”