Mapulang pagsaludo alang kang Kasamang Red nga naghalad sa iyang bililhong kinabuhi niadtong Enero 3, 2012, sa Brgy. San Antonio, RTR, Agusan del Norte. Namatay si Kasamang Red panahon sa pagsulong sa BHB Front21 ubos sa Pulang Diwata Command-BHB sa usa ka 23rd IBPA/CAA detatsment sa maong baryo.

Wala makab-ot ang tumong sa BHB-Front21 nga ikontrol ang maong detatsment aron makuha ang mga armas ug anam-anam nga pagguba/pagpapahawa sa mga army/CAA detatsment sa kabaryohan. Taliwala sa maong kapakyasan adunay kini mga pagtulun-an alang sa umaabot pa nga mga taktikal nga opensiba. Bisan niini nakakuha ang BHB ug usa ka armas nga M14 gikan sa usa ka CAFGU. Apan nabilin usab ang usa M203 gikan sa BHB.

Alang sa mga sibilyan nga maigo sa maong banatan, mangayo kami og pasaylo ug tubagon namo ang tanan balayranan sa pagpatambal. Usa na usab kini ka mapait nga leksyon ug pahimangno sa tanan baryohanon, mga barangay kapitan ug mga army nga angay hugot nga ipatuman ang balaod sa pagtukod sa mga army/CAA detatsment ug mga kampo militar. Gitukod sa Army ang mga detatsment tungod kay dunay gubat sibil karon sa Pilipinas, dunay inyong kontra nga mga rebolusyonaryong hukbo nga naglunsad sa malungtarong gubat sa katawhan. Busa, una sa tanan molikay kamo sa mga lumulopyo nga dili mapagan sa maong gubat.

Angay nagpetisyon ang mga baryohan ngadto sa opisina sa Commission on Human Rights aron mapabalhin kini nga mga kampo og detatsment nga nagpatunga sa mga kabalayan.

Daghan pang mga detatsment og kampo militar dinhi sa CARAGA nga anaa sa tunga sa baryo nga delikado ang mga sibilyan kung dunay mga banatan. Wala ba kaha ninyo gituyo nga magpatunga sa baryo aron mahimong taming ang mga baryohanon.

Niay inisyal nga listahan sa daghan mga detatsment ug kampo nga anaa sa tunga sa baryo.

Agusan del Norte:

1. Mahaba, Cabadbaran
2. Antikala, Butuan City
3. PutingBato, Cabadbaran City
4. BNHQ SF NB anaa sa tunga sa Pirada, Del Pilar, Tubay

Agusan del Sur:

1. San Juan, Bayugan City
2. Villangit, Sibagat
3. Manat, Trento
4. Maligaya, Rosario

Surigao del Sur:

1. Pong-on, San Agustin
2. Tagasaka, Hinatuan
3. Greenfield, Santa Juana, Tagbina
4. BNHQ 75th IBPA anaa sa tunga sa Brgy. Maharlika.

Surigao del Norte:

1. Lahi, Gigaquit
2. Taytay, Cagtinae, Malimono
3. Mayag, Sison
4. BNHQ 30 IBPA Santa Cruz, Placer

Ang pagsulong sa San Antonio detatsment usa ka kongkretong lakang sa kapursigido sa BHB sa anam-anam nga pagpuo sa kaaway sa katawhan nga mao ang tanan armadong pwersa sa reaksyonaryong gobernong US-Aquino.

Ang pagsulong sa BHB sa San Antonio, RTR gigamit na usab nga tungtonganan sa spokesperson sa 41DPA nga dili gusto sa peace talks ang BHB. Apan una sa tanan nagbandilyo na sila nga maglunsad sila og opensiba batok sa BHB. Sa tinuod naunhan lang sila sa BHB sa gilunsad nga taktikal nga opensiba niini, apan wala lang makab-ot ang kadaugan.

Sa tinuod ang mga rebolusyonaryong pwersa ang unang gusto og kalinaw. Aron nga mahunong ang kagutom/kawad-on ug mapundar ang nakinasudnong ekonomiya nga tinuod nagtubag sa panginahanglan sa katawhan. Ang gobernong US-Aquino ang dili gusto sa kalinaw kay hangtod karon wala pa gituman ang obligasyon niini nga buhian ang mga gidakop nga mga consultants sa NDFP. Ang pagbuhi sa mga NDFP consultants usa ka importanteng lakang aron masugdan ang panagsabot-sabot sa kalinaw.

Mga padasig sa mga kauban nga nagsulong sa army/CAA detatsment. Gamiton ang mga pagtulun-an alang sa mosunod nga banatan. Himoong hagit sa pag-asdang ang kinabuhing gihalad ni Kasamang Red alang sa katawhan.

(pinirmahan)
Ka Maria Malaya
Tigpamaba, NDF-NEMR
Enero 4, 2012