Ang kasamtangang pagsulay sa nagharing pundok Aquino aron silotan ug tangtangon ang Punong Mahistrado sa Arroyo nga Korte Suprema nga si Renato Corona pinaagi sa impeachment tungod sa iyang papel sa pagpanalipod kang Arroyo ug iyang mga itoy ug sa pagpadismaya sa mga agalong yutaang Cojuangco-Aquino atol sa bangi sa yuta sa Hacienda Luisita, nagpakita lang sa dili na masulbad nga panagbangi sa makikaugalingong interes sulod sa nagharing hut-ong, ug dugang pang nagbutyag kung unsa ka lalom ug way kaulaw ang burukrata-kapitalismo sa pagpangawkaw nini sa katawhang Pilipino.

Samtang gigamit sa gubyernong Aquino ang impeachment trial aron ipasundayag ang iyang pursigidong tinguha nga subayon ang “tul-id nga dalan,” dili niini mahimong linglahon ang katawhang Pilipino nga pinaagi niini hingpit malimpyohan sa reaksyunaryong gubyerno sa pagpanghukhok ug korapsyon.

Sa tinuoray, ang mga itoy ug mga adunahang kakunsabo nga kapit-tuko kang Arroyo, sama ni Corona nga nagpabilin sa gubyerno, pugos nga ginapalagpot aron makonsolida sa nagharing pundok Aquino ang iyang pagkupot sa gahum, dili lang aron pahuyangon ang mga Arroyo kundili labaw sa tanan aron ipamugos ang ekonomikanhon ug pulitikanhong interes niini nga sukwahi sa pangkinatibuk-ang interes sa masa sa katawhang Pilipino.

Gikinahanglan ug makatarunganon lamang nga si Gloria Arroyo ug iyang mga itoy, lakip na si Corona, masilotan sa ilang pagpangawkaw ug mga krimen batok sa katawhan atol sa maduguong paghari sa rehimeng US-Arroyo sulod sa halos usa ka dekada, nga nabantog sa pagpasamot sa kalisod ug sa walay tulobagon nga pagpamatay sa gatusan ka mga aktibista ug mga nagasupak sa rehimen, lakip na ang mga abogado, relihiyoso ug taga-midya.

Apan sa napamatud-an na sa politikanhong kasaysayan sa nasud, DILI pinaagi sa impeachmet trial ang pinakaepektibong pamaagi sa pagtangtang sa katungdanan sa usa ka lunod-patay nga reaksyunaryo kundili pinaagi sa militanteng kalihukang masa. Kung atong mahinumduman, ang dinagkung kalihukang protesta sa katawhan mao ang nagtangtang kang Estrada kaniadtong 2001, ug nagpalagpot sa diktador Marcos pinaagi sa usa ka pag-alsa kaniadtong 1986.

Busa, samtang nagapadayon ang impeachment trial batok kang Corona,
giawhag sa NDFP-Mindanao ang katawhan nga palig-onon ang han-ay niini alang sa militanteng protesta aron segurohon nga masilotan si Gloria Arroyo ug iyang mga itoy sama ni Corona sa umaabot nga panahon.#

(Pinirmahan)
Ka Oris
Tigapamaba
NDFP-Mindanao