ISANG MALAKING PAGSUBOK O HAMON SA REBOLUSYONARYONG KILUSAN SA CAGAYAN VALLEY ANG TAONG 2005. Naharap ang maliit pang pwersa sa rehiyon sa dalawang hamon – ang pambansang panawagan ng Partido sa kampanyang militar at ang pagpaprayoridad sa CV ng 5thID ng AFP sa kampanya nitong Bantay Laya.

Nababagabag sa paglakas ng rebolusyonaryong kilusan sa rehiyon, ipinakat ng 5th ID ang kampanyang militar na binubuo ng sunod-sunod na malakihan at matagalang operasyon na kawangis ng prinsipyong pang-operasyon ng Oplan Lambat Bitag.

Tama at napapanahon ang panawagan na Agawin ang Inisyatiba at Patindihin ang mga Opensiba at ang mga sumunod na memo ng KTKS sa paglulunsad ng kampanyang militar sa buong bansa. Nararapat lamang na mahigpit na panghawakan ng Partido Komunista ng Pilipinas ang pamumuno at pagsusulong ng rebolusyonaryong Armadong Pakikibaka sapagkat ito ang prinsipal na porma ng pakikibaka sa ultimong pagpapabagsak ng naghaharing mapang-aping sistema.

Bilang bahagi ng pambansang organisayon, tumugon ang KR-CV sa panawagan ng KTKS, at, sa proseso, di lamang nakaambag sa abot ng makakayanan ang Partido at BHB sa rehiyon sa pambansang kampanya, napapurol pa nito ang atake ng kaaway at nabigwasan ito ng maraming beses; at nakahakbang ng malaki sa pagwawasto sa tumatagal na konserbatismong militar at gerilyaismo sa ilang bahagi ng rehiyon.

Tumugon ang lahat ng komite ng Partido sa loob ng mga yunit ng BHB sa saklaw ng KR-CV, kahit noon pa man ay tinutukoy na ng KR na marubdob ang pagnanais ng mamamayan na mapadalas ang mga taktikal na opensiba sa harap ng malalang pagsasamantala at pang-aapi sa kanila.

Tinarget natin ang kaaway na nakakampo, naglalakad at nakasakay. Sa buong taon, nailunsad ang 24 taktikal na opensiba, 91 ang napatay sa kaaway at may di mabilang na sugatan. Sa panig ng BHB, 13 ang depensiba, 10 ang KIA at pito ang nadakip. Naagaw natin ang inisyatiba mula sa kaaway sa pagsusulong ng kampanyang militar dahil sa panahong ito naganap ang 19 na opensiba, isa (1) na depensiba at dalawa na nagbuwis.

Totoo na nakapinsala ang kaaway sa atin, ito ay naganap noong hindi pa natin hawak ang inisyatiba at isang panig lamang ang naisasaalang-alang.

Para sa isang maliit pa lamang na pwersa, malaking bagay sa moral ang pagkasapol na “sa malawak na suporta ng masa at sa paghawak sa inisyatiba, kayang harapin ng organisado ang kampanya ng kaaway”. Ang karanasan natin nitong 2005 ang inspirasyon natin sa higit na pagsulong sa 2006 at sa mga susunod pang taon.

Napalalim natin ang pag-aaral sa batas ng gawaing militar, nasuri ng mabuti ang mga kalakasan at kahinaan ng mga yunit ng BHB sa rehiyon; gayundin ng sa kaaway. Nailuwal ang mga bagong kadre militar, at nalutas ang ilang mga suliranin sa gawaing militar. Ang lahat ng ito ay dahil sa hinawakan natin ang inisyatiba at aktwal nang nag- opensiba.

Napapatunayan sa rebolusyonaryong karanasan ng Partido at BHB sa rehiyon na ang pagsusulong ng gawaing militar sa balangkas ng linya ng Partido na malaganap at masinsing pakikidigmang gerilya na may lumalawak at lumalalim na baseng masa ang bibigo sa Kampanyang Bantay Laya at iba pang kampanyang militar; at magpapalakas sa hukbong bayan at mamamayan.

SA PAGTATAYO NG BASENG MASA AT PAGSUSULONG NG AGRARYONG REBOLUSYON, malaking tagumpay, sa gitna ng operasyon ng kaaway, ang pagdaraos at pamumuno ng Partido sa Kumperensya sa Agreb na naglagom sa tatlong taong karanasan ng rehiyon at nagbalangkas ng tatlong taong tungkulin ng kilusang magsasaka.

Ipinaliwanag ng Partido at pinamunuan ang masang magsasaka sa pagharap sa hagupit ng sunud-sunod na bagyo sa rehiyon matapos ang kalamidad ng tikag. Ulit-ulit na napatunayan ng masa na dala at ipinaglalaban ng Partido ang kanilang interes. Niyakap nila ang panawagan ng Partido na ipaglaban ang hindi pagbabayad ng interes sa utang sa panahon ng kalamidad. Niyakap ng masang magsasaka sa mga larangang gerilya ang panawagan ng Partido na paunlarin ang agrikultura at magtanim ng makakain ng tao imbes na pambentang pagkain ng baboy.

Nakahadlang sa isang antas ang malakihan at matagalang operasyon ng kaaway sa kilusang masa; ngunit nagbabagsak lamang ng bato sa kanyang paa ang kaaway dahil lalo pang natatambad na hadlang ang AFP sa kilusang magsasaka at lalong lumalalim ang galit ng masa sa kanila.

Ang patuloy na paghigpit ng pagkakaisa ng Partido-Hukbo at masa ang dahilan sa mga bigong operasyong triad ng kaaway. Hindi mabura ng malakihan at matagalang RSOT ang mga benepisyo ng masa sa rebolusyong agraryo. Ang pasa ng inpormasyon, hatid ng pagkain at pagpapataas ng moral ng masa ay para sa hukbong bayan.

ANG HAYAG NA KILUSAN ay patuloy na tumatatag at sumusulong kahit pa nagsisikap ang kaaway na pinsalain ito. Ang hayag na kilusang magsasaka ay naikambyo sa paghawak sa mga isyu na may malawakang nakamkam na lupa mula sa pagkahatak na mabaon sa maraming kaso ng pangangamkam sa maliitang saklaw. Lumalapad at tumatatag sa mga unibersidad ang sektor ng kabataan-estudyante. Lumalawak ang saklaw ng mga malalapad na alyansa para sa kalikasan, kalusugan at pagpapatalsik kay GMA.

Idinaos ang mga pulong ng mga komite ng Partido sa iba’t ibang antas sa gitna ng panghahalihaw ng kaaway. Higit pang tumingkad ang pamumuno ng mga kolektibo ng Partido sa Hukbo at sa kilusang masa. Lumaki ang kasapian ng Partido sa lokalidad at patuloy na pinamumunuan ng mga kadre mula antas rehiyon ang mga larangan, at gayundin ang mga kadre ng mga larangan sa mga platun.

Nanatiling mataas ang pagpapahalaga sa pag-aaral sa teorya ng Marxismo-Leninismo-Maoismo at pagpapatingkad ng propaganda at kulturang rebolusyonaryo. Sinikap na gawan ng paraan ang pag-aaral sa lokalidad kahit may operasyon ang kaaway.

Sinasaluduhan natin ang lahat ng kadre at kasapi ng Partido, mga mandirigma ng Hukbong bayan at mga aktibista sa lokalidad sa mga nakamit nating tagumpay. Pinararangalan ng Partido ang mga martir ng bayan na nag-alay ng buhay para sa dakilang layunin.

ANG MGA SUMUSUNOD ANG MGA TUNGKULING NAKAATANG SA ATIN:

MAGPURSIGE TAYO SA GITNA NG MGA OPERASYON NG KAAWAY na kamtin ang target na mapatapos ng mga kursong Marxismo-Leninismo-Maoismo sa kanayunan at kabayanan. Sa pinakahuling pagsusuri, ang sapol at gamit ng Diyalektikong Materyalismo ang magpapasya sa tagumpay ng mga gawain.

Puspusin ang pagsapol sa at pagpapatupad ng panawagan na Agawin ang Inisyatiba. Hindi lamang ito ukol sa gawaing militar kundi sa lahat ng larangan ng gawain; higit nga lamang ang pangangailangan sa gawaing militar.

Sa Armadong Pakikibaka, mahigpit na panghawakan ang mahalagang tungkulin ng panahon – ang pagpapalaki ng hukbo sa lokalidad – ang mga MB, at mga yunit sa panananggol sa sarili; pagtatayo ng mga kor sa depensa ng mamamayan at mga grupong pansuporta sa kombat lalo na ang grupo sa paniktik.

Pahusayin pa ang pagpapatupad ng dalawahang pamumuno sa yunit ng BHB – ang pamumuno sa militar at ang pamumuno sa pulitika. Mahigpit na panghawakan ng kumander sa militar ang gawaing militar; at ng opisyal pampulitika ang gawaing pampulitika. Saklaw ng kumander ang buelo ng gawaing militar, ang pamumuno at pagsubabay sa mga stap militar, lalo na sa paniktik; pagpapatupad ng mga patakaran at paggawa ng mga paraan para maiwasan ang mga depensibang labanan; pagtatayo ng mga imprastrukturang panghukbo sa lokalidad; pagtitiyak sa mga pagsasanay militar at pagpapataas ng kakayahan ng mga buong panahon at bahaging panahon na hukbong bayan; at pag-aarmas ng hukbo sa lokalidad.

Ang tatlong pampulitikang tungkulin naman ang laan sa mga opisyal pampulitika. Abutin ang target sa pagpapalaki ng hukbong bayan habang tinitiyak na walang nakakapasok na hindi kanais-nais. Pasampahin ang mga organisado mula sa 320,000 na nakabenepisyo sa agreb, at pahusayin ang gawain sa pagmamantene ng hukbo.

Bagamat magkaiba ang larangan ng gawain, pagsaluhan ng CO at PO ang pagtiyak na maipatupad at mapagtagumpayan ang mga planong militar. Mataas ang pagpapahalaga ng Partido sa rehiyon na makabuelo ang gawaing militar.

Pagtulungan ng kanayunan at kabayanan ang kilusan sa pagpapatalsik kay GMA.

Anihin ng mga naugnayan sa kabayanan para sa paglapad ng kilusang lihim at suporta sa Armadong Pakikibaka, lalo pa’t tumatalim ang pangil ng pasistang terorismo ng estado.

Pamunuan ng Partido ang pagkakamit ng Plano Ng Rehiyon Sa Tatlong Taon, ito ang ating ambag sa pagkakamit sa Pambansang Plano Ng Tatlong Taon. Itaas natin ang antas ng digma. Iwanan na natin ang istilo ng pagkilos ng tulad iskwad ang saligang pormasyon, piliin natin ang mga t.o. na may kabuluhan sa operasyon at kampanya ng kaaway; palakihin natin ang hukbong bayan at matutong mamuno sa lakas kumpanyang larangang gerilya; palawakin natin ang saklaw ng impluwensya ng Partido sa rehiyon sa pagpaparami ng mga larangang gerilya; pahusayin pa ang koordinasyon at pagtutulungan ng gawain sa kanayunan at sa kalunsuran.

MALALAKING TUNGKULIN ANG IPATUTUPAD NATIN. Kailangan nating labanan ang kaaway at hindi tayo magkakasya sa dating kakayahan. Sa paglaban tayo lumalakas at lumalaki. Ito ang aral natin sa nakaraang ilang taon.

Wala nang ilalakas pa ang kaaway; samantalang ang mamamayan, sa pamumuno ng Partido Komunista, ay isang daigdig pa ang ilalakas. Itinatakda ito ng paglala ng pandaigdigang krisis ng kapitalismo at ang pagbilis ng pagkabulok ng kronikong krisis ng sistemang malapyudal at malakolonyal.

Ang mga kahinaan at pagkakamali natin ay maiwawasto dahil pinamumunuan tayo ng dakilang Partido Komunista, ang tanging Partido na nasa kaibuturan ng prinsipyo ang interes ng mamamayan, at gumagamit ng teoryang napatunayan ang katumpakan sa kasaysayan ng daigdig.

Lubos ang galak natin sa araw ng pagtatag ng Partido. Dahil sa teorya ng Marxismo-Leninismo-Maoismo, kahit balot ng kadiliman ng karukhaan ang daigdig, may nakikitang liwanag sa kinabukasan ng sangkatauhan.