Kasasaad ti Rehiyon ken Pagilian: Kumarka aro a Panagrigrigat ken Pannakairurumen, Umab-abante a Pannakidangadang ken Gubat ti Umili
July 20, 2013

IL PDF
Resize text: A+ A- Reset

Iti maikapat aa tawen ti rehimen nga US-Aquino, sagsagrapen ti umili a Pilipino ti kinarigat ken pannakaidadanes, manipud iti estado dagiti agar-ari a dasig ti dadakkel nga apo’t daga ken kumprador burgesya. Ipatpatungpal daytoy ti nakaro a panaggamrud, kagiddan ti kontra-umili nga Oplan Bayanihan nga addaan panggep a rebbeken ti rebolusyonaryo a puersa iti uneg ti tallo a tawen. Para iti umili ti Ilocos-Cordillera, naibutaktaken ti ubbaw nga arapaap ti “nalinteg a dalan”, ken lumawlawag ti kumarkaro nga imperyalista a panangraut ken militarisasyon.

Kas ti naglabas a tallo a SONA (State of the Nation Address) ni Aquino, sigurado a bin-ig kinaulbod manen ti iwaragawag na. Ipannakel na ti gumilgilap a ladawan ti ekonomya a mangilemlemmeng iti kinaaso-aso na kadagiti ganggannaet, kangrunaan ti imperyalismo nga U US. Agtuloy dagiti patakaran ti rehimen a mangtungpal kadagiti diktar ti International Monetary Fund ken World Bank, ken dagiti dadakkel a bangko a kangrunaan a kontrol ti imperyalista nga U US a mangsigurado iti panangpespes iti kinabaknang ti pagilian, pakairamanan ti rehiyon nga Ilocos-Cordillera.

Agtultuloy ti kumarkaro a panagmirmiraut ken panangliplipit iti umili. Daytoy ti mangiduron iti umili a mamulat iti pudno a kagagalad ti mananggundaway a sistema, lumaban tapno baliwan ti sistema a malakolonyal ken malapyudal, k ken labanan dagiti manangagum a proyekto ken negosyo dagiti ganggannaet ken lokal nga agar-ari a dasig.

Palalo nga agkubkubbo ti umili a mangbak kbaklay iti nakaro a kinarigat

Ibilbilang ti rehimen nga US-Aquino dagiti rehiyon ti Ilocos ken Cordillera kas base a pagpespesan kadagiti kinabaknang. Kangrunaan ditoy dagiti manangagum nga imperyalista a proyekto ken negosyo kas dagiti dadakkel a pagminasan ken planta ti kuryente.

Agtaltalinaed a 599, 814 (wenno apagkatlo ti intero a kadagaan ti Cordillera) ektarya ti naipauneg iti naduma-duma a permiso ken aplikasyon tii dadakkel a panagminas, karaman dagitay nagpason ngem mayap-apila ken mapatpatalinaed latta. Babaen ti narebisa nga EO79 serye 2012, a mangpapartak iti pannakaapruba dagiti sigud nga aplikasyon ti dakkel a panagminas (Large Scale Mines o LSM), adda ti panggep nga agumen ti kadagaan ti pagilian ken dagiti nainsigudan a dagdaga dagiti umili, ken kontrolen dagiti erya ti babassit a panagminas [Small Scale Mines wenno SSM]. Pammaneknek dagitoy ti panggep da nga iyawat kadagiti dadakkel a ganggannaet a kapitalista ken lokal nga aso-aso da ti amin a kinabaknang ti Pilipinas kas higante a ganansya da.

Natudo kas mineral belt a nabaknang iti baalitok ken dadduma pay a kinabaknang ti kabambantayan ti Cordillera ken Ilocos agingga iti baybay. Sadiay Apayao, addan ti pammalubos ti lokal a gobierno para iti panagminas ti Cordillera Exploration Inc. (CEXI), a subsidyaryo ti Nickel-Asia -Sumitomo Metal. Sadiay Abra, naanomalya ti pannakaala ti Grand Total & Exploration Mining Corp. ti endorsement para iti pinal nga ebalwasyon manipud iti Mining & Geosciences Bureau no pay saan a dimmalan daytoy iti proseso ti Free Prior & Informed Consent (FPIC). Sumaksaklaw daytoy iti 11,612 ektarya a kadagaan ti uppat a munisipyo. Nag-drilling operation latta met ti agkasosyo nga Goldfields-Lepanto Consolidated Mining Corp. (G-LCMC) idiay Mankayan, Benguet uray awan ti FPIC. Nagrugi manen ti operasyon iti Philex Mining Corporation kalpasan a maipasardeng daytoy idi naperdi ti mine tailings dam daytoy a nangiwara ti 20 milyong tonelada a rugit/sabidong, ta permi ti panagirupir ti dakkel a kapitalista nga kumpanya a malukatan manen daytoy.

Sadiay Kalinga, malaksid iti Makilala Mining Corp. ti Freeport McMoran (dati a Phelps Dodge) nga ituloy ti drilling ken panagitakder kadagiti pasdek ken dadduma pay nga istruktura iti panagminas, sumsumrek metten dagiti kumpanya nga Carrascal Nickel Corp. ken Indophil — dagiti kumpaya nga addan pagminasan na iti dadduma pay a rehiyon iti pagilian — uray no awan pay pammalubos ti gobyerno.

Natatek met laeng dagiti dadduma pay a probinsya iti rehiyon Cordillera ti aplikasyon dagiti nadumaduma a kumpanya ti minas.

Sadiay rehiyon ti Ilocos, addan ti 24 nga aprubado ken 61 nga aplikasyon para iti Mineral Production Sharing Agreement, Exploration Permit ken Financial-Technical Assistance Agreement a dumanon iti 1,795,597 ektarya, nga ti kaaduan na ket offshore mining.

Dumanon met iti 48 munisipyo ti maapektaran ti magnetite mining iti igid-baybay ti Ilocos, malaksid pay kadagiti apektado sadiay Cagayan a dumanon iti 13,483 ektarya. Addan dagiti limned a baryo (kas ti maysa a paset ti Santa, Ilocos Sur) aglalo iti panawen ti bagyo; kabayatan na, dagiti mangngalap ket mapilitan nga umadayo iti taaw tapno makapagkalap—banag a mangmangted ti peggad iti biagda, at- atiddog nga oras ti panagtrabaho ken nayon a gastos iti gasolina.

Sinerreken ti kapitalista a sistema dagiti babassit a panagminas iti Cordillera. Dimmanonen iti 30,000 ti bilang dagiti minero nga agub-ubra kadagiti SSM iti Benguet, kangrunaan sadiay ili Itogon. Nakaro a riribuk ti mapaspasamak iti Mt. Capcapo iti Baay-Licuan ken Lacub iti Abra. Nairut met a kontrolado ti pamilya Mangaoang ti SSM iti Gaang, Balbalan nga addaan 500 a magunggundawayan a minero. Iggem dagiti pinansyer ti panaggatang ti balitok, panagpaabang kadagiti ramit kas ti ball-mill ken jack-hammer, ken uray ti panag-suplay ti taraon, kemikal ken pasabog. Malaksid iti Banco de Oro ni Henry Sy, simrek metten a kas pinansyer ti sumagmamano a Tsino, Koreano ken dadduma pay a ganggannaet a nangkontrol iti panagtagilakuan ti balitok. Kangrunaan met a gumatgatang ti mine tailings kadagiti SSM dagiti dadakkel a kumpanya iti panagminas a kas ti Benguet Corp., LCMC ken Philex Mining Corporation, ta 40% pay a balitok ti saan pay a naala manipud kadagitoy. Dagiti dadakkel a kapitalista latta ti mangak- akup iti balitok a kinabaknang ti pagilian.

Iti open-pit a panagminas iti Mainit, Bontoc, Mountain Province (MP), addan dagiti panaglangan dagiti ubbing nga ageskuela ta maguyguyod da iti panagbunag ti naba, kasukat ti nababa a tangdan.

Higante a ganansya manipud iti suplay ti kuryente iti Renewable Energy

Agtultuloy dagiti proyekto a pang-enerhiya tapno makaala ti suplay a kuryente iti rehiyon nga Cordillera para iti kasapulan ti intero a Luson. Segun iti listaan dagiti proyekto nga Geothermal ken Hydropower, dumanon iti 1.7 billion watts ti manamnama a mapartuat iti rehiyon. Manipud ti plano a mangipatakder ti 38 hydropower dams a mangpartuat ti 899 Megawatts idi 2010, dimakkel pay daytoy a dumanon iti 67 dagiti proyekto nga agpartuat ti 1,357 Megawatts manipud iti rehiyon. Madoble ti sigud a walo a naaprubaran nga hydropower dam iti MP ken lima iti Kalinga. Sadiay karayan ti Sta. Maria-Allig iti Mallig, Flora, Apayao, mairaman a lumned ti kabalbalayan, maysa a rangtay ken maysa nga eskuela tapno laeng maurnong ti 15.447 milyon cubic meters ti danum para iti dam. Iti karayan ti Abulog-Apayao iti Abulog, Kabugao, Apayao, 600 Megawatts ti plano a partuaten ti Megadam nga itakder ti kumpanya nga Pan Pacific. Ti nasao a dam ket 234 metro ti kangato na ken mayimbak ti 3.98 billion cubic meters a danum.

Kadagiti hydropower dam, 18 ti itakder ti SN Abotiz/Hedcor, nga isu’t mangpatpataray met laeng iti Binga ken Ambuklao Dam iti Benguet, idinto a 13 met ti itakder ti Sta. Clara Power Corp. Gapu iti Renewable Energy Act nga inaprubaran ti US-Arroyo idi 2008, dakkel nga insentibo ti maala dagiti agipasdek ti hydropower dam, karaman dagiti carbon credits ken subsidyo a magastos iti panagaramid ti planta ken sigurado a ganansya gapu iti panangilako ti kuryente iti Wholesale Electricity Spot Market.

Kasupadi dagiti rason dagiti kumpanya nga agitaktakder dagiti hydropower ken geothermal a planta, saan nga agresulta dagitoy iti nababbaba a presyo ti kuryente, aglalo ta bassit laeng ti kasapulan ti rehiyon— tallo agingga uppat a Megawatts laeng para kadagiti probinsya ti Kalinga ken Mountain Province (MP) bayat a sangapulo a daras a dakdakkel ti partuaten nga enerhiya iti target nga 16 hydropower plant iti MP. Uray no saan a bumayag ti maysa nga hydropower plant agingga 25-50 tawen, kas pangarigan, panggep laeng dagiti kumpanya a maala ti climate change mitigation fund manipud kadagiti nadudur-as a pagilian.

Pito ti naaprubaranen a proyekto nga geothermal iti Cordillera manipud iti plano nga walo a planta. Ti kumpanya a Chevron ti natudo kas kangrunaan nga agpupuonan iti proyekto a geothermal iti Lubuagan- Tinglayan, Kalinga; iti Buguias, Benguet; Sadanga, Bontoc, Barlig iti Mt. Province ken Tinoc, Ifugao ken dadduma pay nga aplikasyon iti aglawlaw dagitoy. Ti Chevron met laeng ti mangpatpataray iti planta a geothermal sadiay Tiwi, Albay ken iti MakBan geothermal plant iti Abagatan a Katagalugan.

Agtultuloy a lablabanan ti umili dagitoy a planta a geothermal, kas ti panangbarikada ti umili sadiay Sityo Ag-agama, Western Uma iti Lubuagan, Kalinga, idi Mayo 12, 2012 kontra iti Chevron.

Pinaay met laeng ti umili ti Sagada ken Besao iti MP ti plano ti Philcarbon a mangitakder ti Windmill Farm, ta maagum ti ansestral a dagdagada. Malaksid iti epekto iti suplay iti danum kadagiti taltalon ken komunidad, delikado met laeng dagiti kabalbalayan iti lawlaw ken sakaanan ti bambantay no ipatakder da ti higante nga tore ken kalsada para iti windmill.

Kabayatan na, naimballigian a napasardeng ti umili ti Mankayan, Benguet ti drilling ti Goldfields- Lepanto Consolidated Mining Corp. kalpasan ti atiddog a militante a pannakidangadang ken panagbarikada da. Daytoy ket uray no idurduron latta ti kumpanya ti baro nga FPIC tapno lumawa ti sakuop ti operasyon da.

Nakaro a panangirurumen kadagiti Mannalon, Gardinero ken Mangngalap

Kasupadi ti PR Economics (Ekonomiya nga Public Relations) ti rehimen nga US-Aquino a pasig nga inuulbod, lalo a mailumlumlom iti utang ken kinakurapay dagiti mannalon iti kapatagan ken kabambantayan. Agtultuloy ti panagngato ti presyo dagiti kasapulan iti panagtalon kas ti bin-i, abono, pestisidyo; kasta met ti abang iti irigasyon ken dadduma pay bayat a mabaybay-an latta ti programa ken suporta a pasilidad para iti agrikultura.

Kabayatan na, agtultuloy nga agsusuek ti presyo dagiti produkto nga agrikultural. Manipud iti PhP15 kada kilo laeng nga kangatoan a presyo ti yellow corn (dried), bimmaba pay daytoy iti PhP9 agingga PhP12 kada kilo (PhP10.48 iti kadawyan na para iti Cordillera). Segun mismo iti datos ti gubyerno, idi 2010 ket PhP9.39 ti magastos iti produksyon ti kada kilo ti mais, isu nga lugi pay dagiti mannalon ta awan ti kasukat ti pigsa’t tegged da. Sadiay Ilocos, agtaltalinaed nga PhP40 agingga PhP72 kada kilo ti presyo ti tabako, a bimmaba manipud iti kangatoan na a presyo ti PhP81.50 agingga PhP95 kada kilo idi 2011 agingga ita. Nabayag a nagtalinaed ti tangdan dagiti mangmangged-talon iti PhP80 agingga PhP200 kada aldaw, adayo iti P512 kada aldaw a minimum cost of living ti maysa pamilya nga inkeddeng ti gobyerno mismo.

Dagiti kumpanya iti tabako ti mismo nga agak-akem iti panagusura iti Ilocos. Dumanon iti 15% ti interes iti pautang ti United Leaf Planters Inc., bayat nga ti Phillip Morris-Fortune Tobacco ket agsingsingir ti 15% interes no ti utang ket saan a mabayadan sakbay ti Hunyo 30, nga isu’t panagleppas ti panagtatabako.

Nasaknap met ti panangagum ti dagdaga dagiti mannalon. Sadiay Apayao, inagum ti pamilya nga Cayosa ti 200 ektarya kadagiti mannalon iti Pudtol, Flora ken Sta. Marcela babaen ti panagpatitulo da kadagiti nainsigudan a dagdaga. Kasta met, nalawa ti mapaspasamak a panangagaw ti dagdaga kadagiti lugar a sakop dagiti proyekto ti Renewable Energy ken panagminas.

Dakkel ti bimmassitan ti bilang dagiti gardinero nga agmulmula kadagiti nateng, gapu iti nangato a presyo dagiti kasapulan iti panagmula/farm inputs ken panagsuek ti presyo dagiti produkto a resulta iti panagserrek dagiti nateng ken karne manipud kadagiti pagilian ti Tsina, US, ken awan naanay a tulong ti gobyerno kadagiti gardinero. Nayon na, mailumlumlom iti utang ti umad-adu a gardinero.

Adun a mannalon ti mapilpilitan a mangisugal iti biag da iti napeggad a panagtrabaho kadagiti SSM.

Nakakaasi ti kasasaad ti umili iti Ilocos-Cordillera. Nakabilang ti 2 a probinsya ti Cordillera — Ifugao ken Apayao nu sadinno 47% ken 59.80% ti populasyon kada maysa kadagitoy ket nakabilang kadagiti kakurapayan iti intero a pagilian. Ti nakaro a kasasaad dagiti kabangibang dagitoy a probprobinsya ti rehiyon Cordillera ket saan nga adayo a maipareho iti dua iti ngato. Saan nga makatulong dagiti pangtapal a programa ti rehimen US-Aquino. Kas pangarigan, ti itangtangsit na a Conditional Cash Transfer program wenno Programang Pantawid Pamilyang Pilipino (4Ps), ti pagbanagan ti P300 kada bulan a maawawat dagiti benepisyaryo ket nakabasbassit nu maikissay dagiti taktakda a mangipatpatungpal kadagiti rekisitos kas iti seminar, panag-report ken panagpatsek-ap ken gastos nga agbibiahe a mapan iti sentro. Nu anagen, dakdakkel pay ti mapastrekda nu inusar na dagitoy nga aldaw a nakitegged. Kasupadi na, ti ipapan iti ballasiw-taaw ti migrante a Pilipino ti mangsalsalbar iti adu a mannalon ken nainsigudan nga umili a pasig nakasanggir iti kuarta a patulod dagiti kabagyan da iti ballasiw-taaw. Ti agdama a krisis iti intar ti OFW ita, kas ti panangpaawid iti minilyon a mangmangged manipud sadiay Middle East, Taiwan ken dadduma pay a pagilian, ket sigurado a mangpakaro iti krisis pangkabiagan ti umili iti Amianan a Luzon.

Bulok a Sistema iti Edukasyon ken Salun-at

Kumarkaro pay ti pananglalais a sagsagrapen dagiti nainsigudan nga umili gapu iti pannakapaidam iti karbengan iti edukasyon. Awan serbi ti pannakaingatona nga unibersidad dagiti tallo a kolehiyo iti rehiyon, ta adu met dagiti rekisito pay a narigat a matungpal. Kas pangarigan, lalo a bumasbassit ti subsidyo ti nasyunal a gobyerno para kadagitoy – Mountain Province State University (dati nga MPSPC), Ifugao State University ken Apayao State University (dati nga Apayao State College). Kasta pay a saan nga umabot ti 1,000 ti bilang dagiti estudyante ti Apayao State University.

Saan a nababbaba ngem 7 a dadakkel a pribado nga eskuelaan iti Cordillera ti napalubosan a mangingato ti matrikula iti 5-10 porsyento, ken 7 agingga 27 porsyento ti mabalinda nga ingato iti bayad ti dadduma pay a mabayadan iti panagbasa.

Maipatpatungpal metten ti K+12, a lalo a mangpadpadagsen iti parikut dagiti titser, estudyante ken nagannak. Gapu ta kadawyan a maymaysa laeng ti titser ken kurang dagiti pasilidad, ingkapilitan a makissayan ti aldaw ti panageskuela dagiti ubbing. Iti Abra ken dadduma pay a sulsulinek a lugar iti rehiyon, tallo aldaw kada lawas laeng ti panageskuela dagiti ubbing tapno umannatop iti iskedyul ti sumagmamano a titser. Adda dagiti eskuela nga agkukuyog iti klase ti Grade 2 ken Grade 3, iti maymaysa a kuarto ken maymaysa a titser.

Kurang la ngaruden ti subsidyo para kadagiti pangpubliko nga ospital, mapribado pay dagitoy, kas ti Baguio General Hospital iti Baguio City, Ilocos Training and Regional Medical Center iti San Fernando, La Union ken Region 1 Medical Center iti Dagupan, Pangasinan. Segun daytoy iti programa a Public- Private Partnership ti rehimen nga US-Aquino. Nakarkaro pay, naikkaten ti charity ward dagiti pampubliko nga ospital, ket naisukat ditoy ti pilit a pannakaipatungpal ti Philhealth. Ngem kurang la unay ti maala a serbisyo ken agas iti sistema ti Philhealth; saan a kabaelan ti marigrigat a tennagan ti P300 kada bulan a kontribusyon (a plano da nga ingato iti P600 kada bulan ita a tawen) idinto a sangkasapulan, sangkasaangan la ngaruden ti umili.

Kimmaro pay ti laos a serbisyo a pangsalun-at ti rehimen nga US-Aquino gapu iti naduma-duma a kriminal a panangkissay iti pondo para kadagiti mangmangged iti sektor ti salun-at, kas pangarigan ti P20 laengen nga alawans manipud iti sigud a P50. Iti kabuklan na, adayo a nababbaba ti badyet a mailatlatang kumpara iti inkeddeng ti World Health Organization, a mangibagbaga a lima porsyento (5%) koma ti kabuklan a pastrek ti pagilian ti mailatang para iti serbisyo ti salun-at. Iti agdama, sensilyo laeng a kabatog ti 62 sentimo kada aldaw ti mailatang para ti salun-at ti maysa a Pilipino—kurang pay a panggatang ti maysa a tableta ti simple a paracetamol.

Panagtuloy ti panagari dagiti Dinastiya ken Warlord

Iggem latta dagiti warlord ken pampolitika a dinastiya ti bileg iti pagbiagan ken politika iti Ilocos- Cordillera ken ti panagabante iti interes dagiti dadakkel nga agum iti ekonomya.

Adda iti rehiyon ti sumagmamano kadagiti kababayagan a dinastiya. Malaksid kadagiti Marcos iti Ilocos Norte (IN), dagiti Singson ti Ilocos Sur (IS) ken dagiti Ortega ti La Union, dekada metten ti panagtugaw iti pusisyon ti agama a Bulut iti Apayao. Inton 2016, 37 tawen ton nga iggem ti pamilya Ortega ti umuna a distrito ti La Union, wenno manipud pay a nageleksyon ti Interim Batasang Pambansa idi 1978. No mairaman pay ti panawen sakbay a nayetnag ti martial law, 58 tawen dan a nagari. Iti met tukad ti munisipyo, nasaknap ti nepotismo. Dumanonen iti 43 tawen ti pusisyon ti pamilya a kas alkalde.

Nasaknapen ti burukrata kapitalismo ken kultura ti kinakunniber uray kadagiti lugar a saan a narimbaw ti warlordismo. Kangrunaan a pagalaan dagiti politiko ti makuna nga “standard operating procedure” wenno SOP ti pork barrel, lalo dagitay para koma iti imprastraktura babaen ti Department of Public Works & Highways (DPWH) ken dagiti espesyal a proyekto a kas ti Cordillera Road Improvement Project (CRIP) ken Payapa ken Masaganang Pamayanan (Pamana) manipud iti dakkel a pondo ti Office of the Presidential Assistance on the Peace Process (OPAPP).

Pimmalpak ngem bibiagen da manen ti makuna a “peace zone” dagiti LGUs ken kontra-rebolusyonaryo a grupo, nga iti kinapudno na ket ramen ti Oplan Bayanihan.

Ipagpagna manen dagiti politiko ti gakat nga Organic Act, ti linteg a mangipatungpal ti pangrehiyon nga awtonomya. Awan ti sabali a panggep na daytoy no di ti panangawis kadagiti akintengnga a puersa, karaman dagiti propesyonal ken dadduma pay a sektor, tapno itandudo da dagiti manangagum a proyekto. Maminduan nga insarwa daytoy ti umili ti Cordillera a kas ubbaw nga awtonomiya. Lalo a pampaneknekan daytoy a ti pudno nga awtonomya ket saan a magun-od iti uneg ti sistema a malakolonyal ken malapyudal, a pagar-arian ti dadakkel nga apo’t daga ken kumprador burgesya segun iti diktar ti amo da nga imperyalismo nga US.

Agrugrugi metten ti pabuya da mainaig ti Charter Change. Agpammarang ti Malacanang a saan nga umanamong, ngem agtungpal met laeng daytoy iti panangiduron kadagiti alyado ken taw-an ni Aquino iti Kongreso a sumuporta kadaytoy. Panggep ti Charter Change a lalo a pakaroen ti panagserrek dagiti ganggannaet nga agpupuonan, karaman dagiti dadakkel a ganggannaet a panagminas ken proyekto nga elektrisidad iti Amianan a Luzon. Karaman ditoy ti panagikkat ti limitasyon iti matagikua da a daga ken puonan. Kabayatan na, idurduron da met laeng ti gakat a mangpalubos iti panagsubli dagiti base militar ti US ditoy pagilian.
Kumarkaro a Militarisasyon

Ita a malmalpasen ti maikatlo a tawen ti Oplan Bayanihan ti rehimen nga US-Aquino, napaay ti panggep na daytoy a “parmeken” ti rebolusyonaryo a pwersa nga NPA. Apaman nagtugaw ni Aquino idi 2010, insayangkat da ti nalawa ken aggigiddan nga operasyon iti Cordillera. Dimmanon iti saggaysa a batalyon ti nagoperasyon kada probinsya. Ngem awan ti uray maysa a larangan a gerilya ti NPA ti narebbek, nanayonan pay ketdi dagitoy. Madama nga ipatpatungpal ti rehimen ti plano a nayonan dagiti puersa a pangsuporta iti AFP. Agsasaruno ti panagsanay dagiti pulis iti babaen ti Regional Public Safety Batallion (RPSB) para iti Special Counter-insurgency Unit Training (SCOUT) ken ti Special Action Force (SAF) ti PNP, agserbi daytoy kas nayon a puersa ti AFP kakuyog ti paramilitar nga CAFGU, gapu iti kinakurang dagiti tropa ti Phil. Army.

Innem a batalyon manipud iti tallo a brigada nga nakapauneg iti dua a dibisyon ti AFP ti nakakampo iti Ilocos ken Cordillera. Nakabase ti 81st IBPA (iti babaen ti 703rd IBde iti 7th ID) sadiay Ilocos Sur ken Ilocos Norte, bayat a dua a batalyon ti 503rd Ibde, ti 41st ken 50th IBPA, ket nakatutok iti Abra. Iti sidong ti 501st Ibde, inaplagan ita ti 54th IBPA ti MP bayat a sinukatan ti 17th IB ti 21st IBPA sadiay Kalinga a napan iti Cagayan, ken sinaklaw met ti 86th IBPA ti Ifugao agingga Isabela ken Quirino. Dakkel a paset met ti 77th Cadre IBPA ti nagtalinaed kadagiti ditatsment ti CAFGU iti Cordillera.

Naibutaktaken ti pudno a panggep ti CPLA nga agpampammarang a _socio-economic force. _Nalukasan manen ti traydor a panggep daytoy nga agbalin kas pagreklutaan ti AFP iti intar dagiti nainsigudan nga umili. Kadaytoy Hunyo, adda 168 CPLA ti narekluta iti AFP a mangipatungpal ti panagranggas iti pada da a biktima ti nailian a panangidadanes.

Mapanggudua ti panggep ti panagrekluta da kadagiti nainsigudan nga umili para iti kontra-insurhensya. Paglalabanen da ti naduma-duma a tribu, banag a mangibunga iti tribal war. Gunggundawayan met ti AFP ken PNP dagiti nainsigudan a tradisyon, kas ti panangibales, tapno waraen ti intar dagiti nainsigudan nga umili.

Ipatpatungpal ti AFP ti naikeddeng a rebbengen na nga agserbi kas Investment Defense Force wenno puersa a pangseguridad dagiti proyekto a manangagum, ket kakuyog da itan ti RPSB ken PPSC.

Itantandudo ti NPA ti interes dagiti nainsigudan nga umili tapno mabaliwan ti bulok a sistema ti gimong. Isunga nangato ti palaban a pakinakem daytoy a kabaelan na a rebbeken ti pasista nga atake ti rehimen US-Aquino, no pay basbassit ken nakapkapsut pay daytoy no ikumpara iti kabusor. Pursigido daytoy, kakuyog ti masa ken dadduma pay a rebolusyonaryo a pwersa iti panangidaulo ti Partido Komunista ti Pilipinas, nga ipagballigi ti demokratiko a rebolusyon ti umili nga agturong iti sosyalismo. Pammaneknek daytoy nga agtultuloy a pumigpigsa ti buyot dagiti marigrigat, ken adu pay a balligi ti magun-od.

Iyabante ti gubat ti umili iti nangatngato a tukad

Agtultuloy a papaayen ti umili ti Ilocos-Cordillera, katinnulong ti hukbo da, ti palalo a panagatake dagiti manangagum. Kabinnulig dagiti nainsigudan nga umili ti NPA iti panangsalaknib iti ansestral a daga, kabiagan, kinabaknang ken karbengan.

Nakaro ti panagrigrigat ti umili a gunggundawayan ken binaybay-an ti rehimen nga US-Aquino. Pakpakaroen dagiti mananggamrud a proyekto dagiti imperyalista ken dadakkel a kapitalista ti nailian a pannakaidadanes kadagiti nainsigudan nga umili a kabatog ti panagpunas kadagiti tribu. Gapu ti kinabaknang nga adda kadagiti dagdaga ti umili, nagduduma a manangagum ken mananggudua a taktika ti ar-aramiden ti kabusor. Ti panagkaykaysa dagiti nainsigudan nga umili ti tulbek tapno paayen ti agresibo a panangraut ti estado.

Ti pannakaipatungpal ti agraryo a rebolusyon ken pudno a nailian nga industriyalisasyon ti manggibus iti nabayagen a panagrigrigat, pannakaranggas ken pannakagundaway dagiti nainsigudan nga umili ken amin nga umili a Pilipino. Tapno maipatungpal daytoy, tulbek ti panangagaw ti bileg a pampolitika, panagitakder iti demokratiko a gobyerno ti umili ken panagabante iti sosyalista a sistema.

Babaen laeng ti armado a pannakidangadang a magun-od ti pudno a wayawaya ken pannakalung-aw iti kinarigat. Rebbengen tayo ti panangitakder kadagiti organo ti demokratiko a bileg pampolitika ti umili, panangbukel ken panangsanay kadagiti milisyang bayan, panangparegta iti gerilya a pannakidangadang ti umili ken naregget a panangpairteng kadagiti taktikal nga opensiba.

Dakkel ken napateg ti mainayon ti rebolusyonaryo a tignayan ti Ilocos-Cordillera iti panagabante ti gubat ti umili iti intero a pagilian—ti nainkalintegan a gubat a manggibus iti amin a langa ti panangidadanes ken pananggundaway.

IYABANTE TI GUBAT TI UMILI, AGTURONG ITI NANGATNGATO A TUKAD TI ARMADO A
PANNAKIDANGADANG!

AGKAMENG ITI BAGONG HUKBONG BAYAN!