Opensiba sang BHB sa Nabagatnang Panay
November 22, 2012

Resize text: A+ A- Reset

Duha ang patay kag apat ang pilason sang gin-ambusan sang isa ka yunit sang Bag-ong Hangaway sang Banwa (BHB) sa idalom sang Napoleon Tumagtang Command (NTC) ang isa ka kolum sang Bravo Coy sang 82ndIB sa sityo Tabionan, Brgy. Bucari, Leon Iloilo sadtong Oktubre 27, mga alas 7:30 sang aga. Isa sa mga patay amo si John Philip Durana nga taga-Jaena Sur, Jamindan, Capiz.

Ang naambusan nga yunit sang 82nd IB isa sa apat ka kolum sang militar nga nagaoperasyon kag nagapanugsog sa katalunan agud makakita sang maengkwentro nga BHB. Binantayan sila sang yunit sang BHB kag duha gilayon ang natumba sa una nga bugso sang linukpanay. Nagmaniobra ang yunit sang BHB nga nag- ambus kag hilway nga nakaatras sang madasig nga mag-ayuda ang malapit nga ikaduha nga kolum sang nagaoperasyon nga kaaway.

Banda alas 12 sang udto sa amo nga adlaw, nag-abot ang ayuda nga isa ka MG520 kag isa ka Huey nga helikopter sa pagkuha sang anom ka ginlayungan nga mga kaswalidad. Ugaling, ang Huey pumalyar kag nag-crash landing malapit sa sityo sang Tabionan. Hinapit pa sa poblasyon sang Leon ang mga kaswalidad.

Nagdugang ang konsentrasyon sang pwersa sang militar nga naglakip na sang elemento sang 61stIB halin sa sentral Panay kag 31stDRC. Pinalukpan naman sang isa ka yunit sang NTC ang nagahulag nga kaaway sa bahin sang Brgy. Danao, Leon, nga katambi lang sang Tabionan sang hapon sina nga adlaw. Masunod nga gab-I sang Oktubre 28, ginpuhag naman sang isa ka yunit sang NTC ang command post sang Alpha Coy sang 82ndIB nga nahamtang sa Brgy. Lanag, Tubungan nga malapit sa lindero sang banwa sang Leon sadtong mga alas 7:00 sang gab-i. Naglinapta ang mga tropa nga sa amo nga panahon nagabasketball sa plasa kag nabayaan ang ila mga armas. Namuragmuragan man ang CO sang amo nga yunit sang militar nga natulugan na kag sang magbugtaw halos siya na lang ang bilin sa ditatsment.

Sang petsa 30 Oktubre, nag-abot ang mekaniko sang helikopter nga nasamad kag nagahuyango sa sityo Tabionan. Apang, wala nakay-o ang Huey bangud nadisgrasya kag nahulugan sang salsalon ang ulo sang tenyente nga mekaniko kag siya naman ang gindala sa ospital. Pila pa ka adlaw kag liwat naman ini ginkadtuan sang mekaniko nga kay-uhon apang sang gintilawan nga paandaron kag hana na nga maglupad, nag-aso kag nagkalayo ang helikopter kag wala na makalupad. Ginkarne na lang sang militar ang mga pyesas sang Huey kag ginsunog ang iban nga partes sang helikopter.

Samtang, sadtong Septyembre 27, isa ka katapu sang RPA-ABB ang napatay kag duha ang pilason sang gin-ambusan sila sang isa ka yunit sang BHB sa idalom man sang NTC sa Brgy. Valentin Grasparil, Sibalom, Antique. Nakumpiska sang BHB ang isa ka karbin, duha ka short arms, mga bala, granada kag iban nga gamit militar kag mga dokumento.

Nalipay ang masa kag mga kaalyado sa palibot nga kabarangayan sang Sibalom kag katambi nga lugar sang San Joaquin, Iloilo bangud nabuhinan ang mga buyong nga RPA-ABB nga nagapangilkil sa ila.

Antes sini, sadtong Agosto 27, isa ka katapu sang 82ndIB ang pilason sang makaengkwentro sila sang isa ka yunit sang BHB sa Brgy. Onop, Miag-ao, Iloilo.

Topics: People's War