Hustisya alang sa pamilyang Capeon, Hustisya alang sa tanang biktima sa mga bangis, mangingilog sa yutang kabilin ug makadaut sa kinaiyahan nga mga higanteng Mina!
November 08, 2012

Resize text: A+ A- Reset

Nag-awhag ang NDFP-Mindanao sa tibuok katawhan, mga relihiyoso, mga nagmahal sa kinaiyahan ug makinasudnong pulitiko ug LGU, ug mga pundok nga supak sa imperyalistang pagmina, mga patriyotikong organisasyon apil na sa tibuok rebolusyonaryong pwersa sa Far Southern Mindanao Region alang sa hiniusang paningkamot alang sa pagpangitag hustisya sa mga biktima sa pagmasaker sa pamilya ni Daguil Capeon nga nagsupak sa makadaot nga langyawng pagmina sa Xstrata-SMI.

Atol sa pagsaulog sa bulan sa alang sa mga lumad, ang pamilya ni Daguil Capeon, iyang asawa ug duha ka anak, linuog nga gipamusil sa pasistang tropa sa Bravo Coy sa 27th IB ubos ni 1Lt. Dante Jimenez niadtong Oktubre 18, 2012 didto sa Sitio Datal Alyong, Brgy Kimlawis, Kiblawan, Davao del Sur. Si Daguil Capeon inilang lider sa mga B’laan sa rehiyon nga dugay nang nagsupak ug naglunsad og rebolusyonaryong pangayaw batok sa Xstrata-SMI nga pugsanong miilog sa yutang kabilin sa mga lumad ning pipila na ka tuig.

Ginganlan silang mga ordinaryong “bandido” sa AFP ug uban pang kakunsabo sa kompanya nga mga lokal nga pulitiko sama sa Kiblawan aron ilimod ang lehitimong pakigbisog sa katawhang B’laan alang sa pagpanalipod sa ilang yutang kabilin ug aron tabunan ang mangilngig nga pagmasaker sa AFP nga gipaluyohan sa higanteng kompanya sa mina.

Tungod sa maong krimen sa mga sinuholan sa kompanyang Xstrata-SMI, walay ulaw nga gipanghingusog nilang Col. Lyndon Paniza, tigpamaba sa 10th ID ug Brigadier General sa 10th ID nga si Ariel Bernardo, nga dunay nahitabong “lehitimong engkwentro” tali sa 27th IB ug sa grupo nilang Daguil Capeon. Apan sumala sa gipahigayong mga fact-finding missions nga gipangunahan sa taga-simbahan, mga enviromentalists ug progresibong mga organisasyon, walay nahitabong sinukliay sa buto tungod kay walay laing armado sa maong lugar niadtong panahona kung dili ang tropang militar lang sa AFP.

Kini nga bag-ong krimen batok sa katawhan sa pakigkonsabohay sa AFP, Xstrata-SMI ug sa rehimeng US-Aquino miani og panghimaraot gikan sa katawhan, mga taga-simbahan, eskwelahan, mass media, mga environmentalists ug bisan sa Kongreso. Hugot usab nga nagkondena sa maong krimen ug dugay nang nagsupak ang lokal nga panggamhanan sa probinsya sa South Cotabato ug bisan ang Diocese sa Koronadal batok sa open-pit mining sa Xstrata-SMI.

Nabulit sa dugo ang mga bulawan ug minerales sa proyektong imperyalistang pagmina sa rehimeng US-Aquino sa tibuok nasud. Partikular sa Mindanao karong tuiga, sunod-sunod ang mga pagpamatay ug pagpamanhig nga hinimoan sa mga armado sa estado batok sa mga aktibistang lider sa mga organisasyong nagsupak sa dinagko ug makadaot nga pagmina. Pilila niini ang mosunod:

  1. Marso 5. Pagpatay kang Jimmy Liguyon, Brgy Kapitan sa Dao, San Fernando Bukidnon. Si Jimmy hugot nga nagsupak sa planong pagsulod sa langyawng kompanya sa mina.
  2. Abril 16. Pagpatay sa Kapitan sa Dapore nga si Francisco Arado ug iyang secretary nga si Edith Navarro sa Sitio Balabag, Brgy. Dapore, Bayog, Zamboanga del Sur. Hugot silang nagsupak sa pagpalapad pa sa Toronto Ventures, Inc. sa erya sa Bayog nga moapekto sa mga small-scale miners ug mga umahan sa mga lumad ug mag-uuma.
  3. Mayo 9. Pagpatay kang Margarito Cabal sa Kibawi, Bukidnon. Si Cabal inilang nagababag sa pagsulod sa dinagkong pagmina ug pagtukod og dugang nga mega-dam sa suba sa Pulangi sa Bukidnon.
  4. Setyembre 13. Pagpatay kang Genesis Ambason, usa ka anti-mina nga lider sa mga lumad sa San Luis, Agusan del Sur. -
  5. October 4. Pagpatay kang Gilbert Paborada, lider sa kontra-dinagkong pagmina sa San Nicolas, Puntod,
    Cagayan de Oro City.
  6. October 29. Samdon human gipusil si Dr. Isidro Olan, executive director sa Lovers of Nature Foundation, Inc. Barangay Puyat, Carmen, Surigao del Sur. Si Dr. Olan hugot nga nagasupak sa dinagkung pagmina sa Surigao del Sur.

Gawas pa niini, ang katawhang lumad nag-atubang usab sa grabeng militarisasyon sa kabukiran aron pag-abog sa mga lumad gikan sa ilang mga komunidad alang sa dinagkong pagmina. Gawas sa Xstrata-SMI nga pinakadakong proyekto sa mina sa bulawan sa tibuok nasud (sa Farsouth Mindanao Region), anaa usab ang militaristang kompanyang TVI sa Zamboanga Peninsula (Western Mindanao Region), ang Taganito-Sumitomo THPAL, Greenstone, SRMI, ug uban pa sa Caraga Region (Northeast Mindanao Region), Russel Mining ug Southeast Mining sa Comval Province (Southern Mindanao Region). Nagkadako na usab ang mga luna sa pagmina nilang Danding Cojuangco ug Lucio Tan sa pakigkonsabo sa mga imperyalistang minahan dinhi sa Mindanao.

Dugang usab niini, nameligro nga mailog ang nahibiling yutang kabilin sa katawhang lumad sa Mindanao tungod sa pagmaniobra ug pagsulod sa mga kompanyang agri-bisnes nga mga plantasyon sama Del Monte, Dolefil, Sumifru ug uban pa, kakonsabo ang mga kurakot nga sa gobyerno sama sa DENR, DAR ug NCIP aron tamnan og pinya, saging, oil palm ug uban pa ang tabunok ug halapd nga kayutaan sa Mindanao. Pipila ka mga kaso sa mga pagpangilog sa kayutaan sa mga lumad ang nahitabo sa Marilog, Davao City, sa Tulunan, Magpet, Antipas ug Arakan sa North Cotabato, sa Opol, Misamis Oriental, sa Bukidnon, sa Caraga region, sa Siocon, Zamboanga del Norte ug daghan pang uban.

Niadtong tungang bahin sa tuig 2012, mokabat sa kapin 1000 ka pamilya o kapin 5000 ka mga indibidwal nga mga lumad ug mag-uuma gikan sa Agusan del Sur, Agusan del Norte, Surigao del Norte, Zamboanga del Sur, Bukidnon ug North Cotabato ang mibakwit gikan sa ilang mga komunidad tungod sa operasyong “pag-clearing” sa pasistang AFP nga direktang kalambigit sa mina ug plantasyon sa mga dagkung burgesyang kumprador ug mga imperyalista.

Nag-awhag ang NDFP-Mindanao sa katawhan sa Mindanao nga labaw pang palapdon ug pakusgon ang mga hiniusang kalihukan aron mahatagag hustisya ang mga biktima sa masaker nga pamilyang Capeon ug ang tanang biktima sa pagpamatay ug ubang kalapasan sa tawhanong katungod nga gihimo sa mga armadong pwersa sa rehimen sa ngalan sa dagkung burgesya ug imperyalistang mina ug plantasyon. Dili igo ang pagpapahawa ug pag-court martial lamang sa mga pasistang tropa sa AFP nga direktang nalambigit isip bugti sa mga biktima sa masaker ug mga komunidad nga naguba tungod kay kini sila mga sulogoon lang sa utok sa krimen. Kinahanglang pakusgon pa ang mga rebolusyonaryong pagsukol hangtod mapalayas sa nasud ang mga imperyalistang kompanyang kakonsabo ang mga dagkong burgesya kumprador ug dagkong agalong yutaan nga nangilog sa mga yutang kabilin sa mga lumad, nagadaot sa atong kinaiyahan, nagayatak sa atong soberanya ug nagbaligya sa atong patrimonya.